Connie Reumowa ze Strjažowa jo pśed tśimi lětami se wupórała ze swójim synkom Mika do Grodka, do tamneje motocross-akademije woglědat. Wónej stej kśěłej se wokus pśejěś na motorskem kólasu, jano na probu.

Nicht njejo se tencas zewšym myslił, až take njewinowate wótmyslenje změjo take konsekwence za togo tencas 11lětnego gólca. Pśeto z njogo jo nastał dobry jězdźaŕ, motocross-pilot, a wón wordujo licony k sportarskemu dorostoju, kótaregož wugbanje wjele lubi za pśichod. A teke jogo mama jo mjaztym wobstała pśespytowanje a jo pśipóznata trenarka we tej disciplinje motorsporta.

Krotki cas pózdźej jo Mika sejźeł na swójej prědnej mašinje. Intensiwny trening jo wugbał, až wón jo ju skóro pśi wuběgowanju wó enduro-cup wjelgin šykowanje a spěšnje wjadł pśez górki a doły.