Jarješk/Jerischke. Tym 8- do 13lětnym źiśam a młodostym organizěrujo Rěcny centrum Witaj (RCW) južo wjele lět Witaj-camp. Lětosa su póbyli zasej w Jarješku w tamnej Šulskej wjažy na jsy (Schullandheim). 26 źowćow a gólcow jo se wobźěliło. Jich su wobstarali Kathrin Šwjelina a Bernd Melcher wót RCW kaž teke studentka sorabistiki Silva Oehlertojc. Kněni Šwjelina jo zgromadnje z pomocnikami to lěgwo pśigótowała.
Program lěgwa wót njeźele do pětka jo był wótměnjaty z wjeraškom kuždy źeń. Ale take něco tam hyšći žednje njejo se stało, až jo policaja pśišła, a to ned pónjeźele. Wjednikoju lěgwa su to kólaso wukšadnuli, a něnto su pśišli policisty se pšašat, chto by mógał złoźej byś. Te źiśi su jim pomogali z pomocu cedlikow, źož su byli źiwne znamuška napisane. Na kóńcu su napšawdu někogo namakali a pśimjeli a z pytkoma na ruce wótwjadli. Ta ceła akcija ga jo we wěrnosći skazana była: žedno kólaso ga njejo se tam zewšym wukšadnuło. Wšykno jo pak wjelgin realistiski pśedstajone było.