Lětosa jo se wótměło 8. lěśojske młoźinske lěgwo Rěcnego centruma WITAJ. My, 5 młodostnych, smy pśebyli 5 dnjow w młodowni Borkow. W tom casu smy wjele coolnych wěcow dožywili. Ale na zachopjeńku smy se stwórtk, 21. julija, wopóznali a zgromadnje serbske graśe grali. Na drugem dnju smy měli fotoworkshop ze šefredaktorom Casnika Gregorom Wieczorekom. Pózdźej smy to, což smy nawuknuli, wuproběrowali, z tym až smy fotografěrowali pśi Bismarckowem tormje. Pótom smy cołnowali w Błotach a smy serbske spiwy spiwali. Na kóncu smy jědli lod, nowe a zajmne sorty, na pśikład górkowy abo twarogowy lod.

Sobotu smy kólasowali do Tšupca. Tam smy se wogledali staru žytowu žurlu (Kornspeicher), źož su tšašne pupki a plumpsowe toalety byli. Smy wiźeli stare serbske wěcy, na pśikład drastwu a „wjelicarske“ nawlacenje za póstolu. Pón smy šli k młynoju w Tšupcu, źož smy nazgónili, kak su młyny něga funkcioněrowali a kak su luźe lany wólej producěrowali. Strowy lany wólej jo nam wjelgin derje słoźeł. Na kóńcu smy byli pśi Běłogórjańskem jazorje se kupat.