Prjawoz/Fehrow. Raz wob lěto wobradujo źěłowa kupka „Serbska namša“ něźi wence w „zelenem“. 12. julija jo ju faraŕ na wuměńku Helmut Hupac do Prjawoza na swójo byśe kazał. Cerkwine procowarje su mógali rědnje na dwórje za blidom sejźeś a pód wórješynu planowaś. Faraŕ Hupac jo pśechwatał pśibytnych z mlincami, kótarež jo wón sam wupjakł. K tomu stej słoźełej kafej a doma gótowana jagodowa marmelada. To jo wšo pśijaznu atmosferu dało za efektiwne pósejźenje, na kótaremž kupka jo žedne namše togo lěśa pśigótowała.

Ako kužde lěto buźo pśiducu njeźelu, 31. julija, zeger dweju serbska namša we Złem Komorowje w tamnej Serbskej cerkwi. Prjatkowaś buźo faraŕ na wuměńku Dieter Schütt. Pó namšy su wšykne wutšobne kazane na kafejpiśe a spiwanje ze serbskim dušepastyrjom Ingolfom Kśenku.

Wjerašk togo lěśa buźo Serbski swěźeń w Janšojcach, kótaryž se wóswěśijo z namšu 21. awgusta. Serbska namša z Bóžym blidom z fararjom Ingolfom Kśenku zachopijo se zeger 9:30. Na tej namšy se pśedstajiju zjawnosći nowe spiwarske za młoźinu z titelom „Tyca“.