Z Rogowa/Horno. Cesto smy juž wótśišćali w zajźonych lětach rědne bildki wót zapusta w Rogowje. Wiźeś su žeńske w zwuconej dolnoserbskej swěźeńskej drastwje wokoło Chóśebuza. Swětłe žyźane a wušywane cypjele z cańkami na kšomje, běłe šorce a jadnobarwne kóšule z wušywanym bantom a cańkami. Toś ta moda jo se w Rogowje pak akle pó Drugej swětowej wójnje pśesajźiła. A teke pó pśewrośenju, zachopjeńk 1990ych lět, su Rogowarje zasej zachopili serbske nałogi kaž zapust woplěwaś, ale su se dla bracha spócetnych rogojskich drastwow zasej zepěrali na drastwinu wariantu wokoło Janšojc. Až su se pó wójnje toś tu drastwu woblekali, ma nejskerjej z tym cyniś, až jo ta drastwa wěcej tegdejšej moźe wótpowědała, abo z tym, až jo wjele žeńskich ze susednych jsow ako z Janšojc, z Mósta abo z Turjeja swóju drastwu sobu pśinjasło, ako su se zaženili do Rogowa.