… su wobźiwowanja gódne architektoniske twarjenja wšuźi na swěśe. Z móstami pśewinu se dłymoke abo płone doły, mórja, rěki a rěcki. Znajomy mósty, kenž se wótwěraju, aby łoźi mógali pśejěś, wisate a słupowe mósty, mobilne pontonowe mósty za malsne na- a wótwarjenje. Z raneje historije znajomy śěgate mósty. Drjewjane ławki w Błotach słušaju nejskerjej k nejmjeńšym a tola efektiwnym a regionalnje typiskim móstowym konstrukcijam: Su z domacnego, dorostujucego materiala. Pěšy pśiźoš lažko pśez nje na tamny bok a pód móstom móžo cołnaŕ/ka z wóznom (Fracht) pśejěś. Hynac jo to pśi betonowych konstrukcijach za asfaltěrowane drogi w błośańskej krajinje. Tam su myslili skerjej na nadrozny wobchad. Cołnaŕ/ka musy se zechyliś, gaž z turistiskim cołnom pód nim pśejěźo. Mósty wšak su w idealnym paźe konkretnym pśirodnym geofyzikaliskim wobstojnosćam pśiměrjone, su unikatne a jich natwaŕ a wótwardowanje stej za wětšy źěl wjelgin drogej.