Dnja 28. oktobra jo swěśił slawist dr. Hync Rychtaŕ w Slěpem swóje 75. narodniny. Šwity něgajšnych studentow na Instituśe za sorabitiku Lipšćańskeje uniwersity dopominaju se na njogo ako docenta z wobšyrneju wědu, mócnym humorom a ze zamóžnosću, jim maśiznu wó serbskich a słowjańskich rěcach ako teke rěcywědne nuanse ze zagórjonosću a sćerpnosću pósrědniś. Młogim jo wón był mentor a jo jim źurja k maminej rěcy wótwórił.

Legendarne su teke jogo ekskursije do bliskich a dalokich stronow wót brjogow Solawy a Unstrut až do Tatrow. Hync Rychtaŕ jo wuběrny organizator a jaden „žywy słownik“, což wšak rownocasnje za wótere słowjańske rěcy pótrjefi. Wjele lět jo za sorabistow w Lipsku góstne cytanja a seminary organizěrował, tak až su měli studěrujuce móžnosć, wětšynu serbskich wědomnostnikow zeznaś.