35 lět mamy my Serby lětosa našu Załožbu za serbski lud. Wóna financěrujo serbske institucije tak ako jadnotliwe projekty a wóna swójske projekty na nogi stajijo. Cełu źěłabnosć na wócyma ma Załožbowa rada ako póraźujucy a doglědowaŕski gremium. Rowno pytaju w Dolnej a Górnej Łužycy zasej kandidatki a kandidatow za nowu załožbowu radu.

Co cyni rada, cogodla dejali se Serby za nju angažěrowaś? Pšašanja wót Diany Šejcvoweje na aktualny cłonk Załožboweje rady Angelu Šurmanowu...

Co cyni Załožbowa rada?

Nadawki za nas cłonki su zwětšego wjelgin kompleksne. Źo cesto wó zasadne, wjelgin eksistencielne pšašanja k financěrowanju, nic jano wót institucijow, ale teke wót nejmjeńšego kulturnego projekta na lanźe až k wjelikim twaŕskim projektam.

Kak dłujko južo źěłaśo w Załožbowej raźe?

To jo něnto mója druga legislaturna perioda. Mjaztym som małku pśestawku měła, ale pón som se zasej rozsuźiła sobu cyniś, dokulaž mam ten gremium za wjelgin wažny, za zakład. Pjenjeze ga kuždy trjeba.

Kak wuglěda za Was nowy cłonk Załožboweje rady? Co jo wažne?