Z Města/Cottbus. „Lěto jo pśisamem mimo“, tak jo pówitał młoźinski koordinator Domenik Krötel tych něźi 14 pśibytnych młoźinskich kupkow Domowiny. Dnja 28. oktobra su wóni se wupórali na pśedslědne pósejźenje młoźinskego aktiwa w Serbskem domje w Chóśebuzu.

Su wugódnośili

lětosny Superkokot

Dnjowny pórěd jo kradu krotki był. W prědnem rěźe jo to šło wó wugódnośenje lětosnego Superkokota w Kupaŕskich Bórkowach (Burg-Kauper) a Domenik Krötel jo kśěł wót młodostnych wěźeś, kak spokojom su z tym zarědowanim byli. Ale teke wón ako głowny organizator jo se wě měł swójo měnjenje k swěźenjoju, kótarež jo se pśewjadł kóńc septembra. A ze pśewjeźenim zarědowanja jo wón wjelgin spokojom był. Městnosć za wiśe – za fortu a wěnce – jo wón se hynac pśedstajił, lubjej nic direktnje na łuce. „Pla tych źowćow, kótarež su wili, cu se hyšći zagroniś. Pśiducy raz pśinjasom ten dobry drot za wiśe sobu“, jo wobwěsćił Domenik Krötel. Pśibytne źowća su to ze smjejkotanim kwitěrowali. Kröteloju jo teke gronił, až moderacija jo była pśeśicha, nic pśecej k rozměśeju.