Z Dešna/Dissen. Južo někotare lěta zarědujo Domowina – župa Dolna Łužyca póbitowanja w šulskich prozninach, tak teke lětosa. 10 źiśi z Chóśebuza jo se wót 26. až do 30. oktobra na tom wobźěliło. Wó wótměnjaty program stej se starałej Iben Lotric, rěcna motiwatorka Domowiny, a Franciska Albertowa, zagronita za serbske młoźinske źěło. Wuwześnje su se tenraz za prozninski tyźeń do dešańskego Serbskego dwóra zakwartěrowali, aby wóttam kuždy źeń rědne wulěty pśewjadli. Tak su byli na špacěr pó Dešnje, w chóśebuskej hali za smyckowanje „Klunker“, w Bórkowach na slědach serbskego krala a pla tych alpaka wu Šeric familije.