Ze Slěpego/Schleife. Domyslimy se raz. Łoni w septembrje bu 1. źěl tłusteje Slěpjańskeje chroniki w nowem gósćeńcu „Piwarnja“ pśedstajony (Nowy Casnik běšo we swójom wudaśu 37/11.9.2025 wó tom pisał). Hartmut Hantšo, ako jo lětosa wóswěśił swój 60. burstak, běšo tegdy pśipowěźeł, až buźo 2. źěl wejsneje chroniki kóńc lěta 2026 dogótowany. A glědaj: Wón jo swójo zlubjenje tež doźaržał, a slěpjańske luźe njejsu musali hyšći až do kóńca něntejšnego lěta cakaś. Južo w oktobrje su byli toś te knigły w chóśebuskej śišćaŕni Schiemenz dośišćane, a to we wjelgin dobrej kwaliśe a na dobrej papjerje.

Tak ako južo pśi zjawnej premjerje 1. źěła Slěpjańskeje chroniki stej głowny awtor Hartmut Hantšo a serbske towaristwo „Kólesko“, ako jo wudało te knigły, teke tenraz na prědne pśedstajenje kazałej slěpjańskich wobydlarjow a teke drugich interesentow slědny tyźeń wałtoru, a to zasej do „Piwarnje“. Zajm jo był napšawdu wjeliki, něźi 100 luźi jo było wjelgin narskich, co w tych nowych knigłach wšykno stoj. Su musali samo pśidatne stoły nosyś do zala, aby mógali kuždy tu wósebnu premjeru sobu dožywiś.