Z Budyšyna/Bautzen. „Ja mam serbsku wutšobu“ – To groni lyriski ja Juro Surowina (1831-1904) w dolnoserbski napisanej basni. Rownocasnje jo to było titel zjawnego wjacora Serbskego instituta (SI) srjodu tyźeń w budyšyńskem Serbskem domje. Něźi 40 gósći jo se zgromaźiło, aby wěcej wó tej zajmnej wósobje zgónili. Naroźił jo se Juro Surowin, nimski Georg Sauerwein, w lěśe 1831 blisko Hannovera a jo se cas žywjenja za rěcy zagórił – jo wobkněžył drje wěcej ako 70. Wósebnje małe rěcy su jogo fasciněrowali, jo pśebywał dlejšy cas we Łužycy a jo chopił serbski basniś. Teke litawšćinu jo běžnje wobkněžył. Jogo litawski spiw „Ako Litawske smy roźone“ jo źinsa hyšći popularny a płaśi ako druga hymna.