Wótpšawa: Andreas Gabriel (Lia Rumantscha), Beata Brězanowa (RCW), Mathias Stuflesser (wótźělenje za ladinske kubłanje a kulturu Pódpołdnjowy Tirol), Ignacio Pérez Prat (Lia Rumantscha), William Cisilino (regionalna agentura za friulšćinu ARLeF) Foto: Domowina 
Cuira/Chur. W retoromaniskem źělu Šwicaŕskeje, w měsće Cuira (retoromaniski za Chur) jo se wótměł 23. a 24. oktobra forum europskich regionow FUEN pód motom „kumštna inteligenca a mjeńšyny“. Na fachowej wuměnje, kótaruž jo retoromaniska kšywowa organizacija Lia Rumantscha sobu organizěrowała, jo se wjednica Rěcnego centruma WITAJ, dr. Beata Brězanowa, wobźěliła.
W srjejźišću lětosnego foruma jo stojało pšašanje, kótare šanse kumštna inteligenca (KI) bitujo, ale teke, kótare wupominanja z tym zwisuju. Za mjeńšynowe rěcy móžo KI mjazy drugim rěcne bariery wóttwariś abo pśełožki pólěpšyś, rownocasnje pak wobstoj tšach, až njejo južo rownowaga mjazy rěcami, gaž rěc mjeńšyny w treningowych datach njejo dosć prezentna. Wósebnje mjeńšynowe rěcy a wótpowědujuce perspektiwy a pótrjeby pśi wuwijanju KI-systemow se cesto pśi wuwijanju zanjeroźuju.
