Z Lipska/Leipzig. Na jubilejnem zarědowanju pětk, 30. oktobra, ku góźbje 75-lětnego wobstaśa sorabistiki w Lipsku, su se zmakali zastupniki z wědomnosći a politiki w Starem senatowem zalu Lipšćańskeje uniwersity. Wjele casa za slědkglědanje a nostalgiju njejsu sebje pak wezeli. Jo šło wó pśichod Instituta za sorabistiku a wó pśichod serbskego ceptaŕstwa.

Alena Belkotec jo rowno zachopiła studěrowaś sorabistiku a južo wumarkowała brach: „Pytnjoš, až felujo personal, teke kurse a seminary maju se gromadu połožyś. Z tym ta kwalita jo kusk niska. Wjaselim se wó wšo, což mógu wześ sobu, ale tam su problemy.“ To su zagronite z politiki a wót uniwersity spóznali. Uniwersita Lipsk jo wuwijała koncept za mócowanje sorabistiki. Ta dostanjo pśidatnu profesuru za literaturu a kulturne studije. Studijny plan za pśichodnych ceptarjow su aktualizěrowali. Ten wótpowědujo něnto krajnym šulskim pśedpisam, groni wědomnostnica pśi sorabistice, Jana Šołćina.