Ze Serbskego domu. Za dwě młodej žeńskej jo był ten lětosny 28. oktober wjelgin wažny, jo, samo jaden glucny źeń. Wónej ga stej mógałej gromaźe prědny raz swóje wobraze pokazaś w jadnej wustajeńcy. Jadna jo Lena Kolbowojc/Kolbow, 24 lět młoda, ako bydli w Limbarku. Jo wuknuła serbsku rěc na zakładnej šuli w Kśišowje/Krieschow a pózdźej jo se na Chóśebuskem OSZ (Oberstufenzentrum) wukubłała ako wótkubłaŕka a pśipódla jo se wobźěliła na pśidatnem kursu za serbsku rěc. Swój praktikum jo wóna cyniła we Witaj-źiśowni „Villa Kunterbunt“ w Chóśebuzu. Wóna studěrujo na ceptaŕstwo za zakładnu šulu na Bramborskej techniskej unwersiśe a se wobźělijo na nowem modulu za serbšćinu. Druga jo Michelle Kalzojc z Chóśebuza, 28 lět stara, a źěła ako terapeutka za zbrašonych źiśi.