Pózdnicki pomogaju južo dłujko w medicinje

Rowno zakwituju wšuźi te lylowe głowki pózdnickow (Herbstzeitlose). Na prědne póglědnjenje dopomnjeju te małe kwětki snaź na znate krokuse, kenž w nalěśu na łukach a w zagrodach stoje, a su k pśepóznaśu na se pódobne. Ale te pózdnicki su wó wjele gadowatše, ako te rane kwitaki. Wóni producěruju gad colchicin, což jo we wšych źělach rostliny a jo za luźi a zwěrjeta zawdaśeński. Weto wužywaju toś ten gad w medicinje. Izolěrowana statkowna srědnosć (isolierter Wirkstoff) pomaga pśi eksaktnem dozěrowanju pśeśiwo akutnym atakam popajźi (Gicht-anfälle). Južo w antikiskej Egyptojskej su toś te kwětki pśeśiwo bólam w zgibadłach wužywali. Tencas jo měła pózdnicka mě „hermodactylus“ (palc Hermesa). Stare grichiske su lubosne mě „łdza Medeje“ wužywali. Pó starej powěsći jo pózdnicka nastała ze łdzow Medeje, kenž su dołoj padnuli, pó tom, až Jason jo ju spušćił.