Germanizatoriska politika pšuskich šulow jo měła mócny wliw na pśenimcenje wjele Dolnych Serbow. Teke wšake ceptarje, ako su byli sami Serby, su źiśi nuzkali, aby nimski powědali. Su pak byli teke pozitiwne wuwześa. K nim jo słušał ceptaŕ Kito Dabo (znaty teke ako Kito Dabow, nimski: Christian Dabo).

Něnto smy swěśili jogo 180. narodniny, Dabo jo se wšak naroźił 8. oktobra 1846 w Popojcach (Papitz). Wón jo był syn kósaca (Kossäte). Pó absolwěrowanju wucabnikojskego seminara jo źěłał nejpjerwjej krotko ako pomocny ceptaŕ w Kopacu (Koppatz) a w Rubynje (Ruben), a to w lětach 1867-1870. Pótom, pśez 31 lět, rozmjej mjazy 1870 a 1901, jo ceptarił w Zaspach (Saspow). W tom casu jo źěłał w zaspickej šuli jano jaden ceptaŕ. Akle wót lěta 1908 jo w Zaspach był teke šulski wjednik a wěcej wucabnikow. Dabo jo wuwucował źiśi w jich maminej dolnoserbskej rěcy. Chórosći dla jo šeł Dabo 1. oktobra 1901 w starstwje 55 lět na wuměńk. Slědne lěta swójogo žywjenja jo bydlił w Strobicach (Ströbitz).