Knigłowe wiki za źiśi a młoźinu se pśeměnjuju. To wujźo teke z informacijow tych na 7. oktobrje wótwórjonych lětosnych knigłowych wikach we Frankobroźe nad Mohanom (wót 7. do 11. oktobra). Milenka Rječcyna wót Serbskich Nowin jo se z jadnarjom Ludowego nakładnistwa Domowina (LND) Symanom Pětrom Cyžom rozgranjała.

Knigłowe wiki w Nimskej, pśedewšym źiśece a młoźinske nakładnistwa, zgubiju kupcow. Kaka jo situacija w Serbach?

■ Situacija pó cełej Nimskej pokazujo se teke w našom nakładnistwje. Pśedawańske licby za knigły źiśeceje a młoźinskeje literatury spaduju, to mjaztym južo tśi lěta wobglědujomy. A to njepótrjefijo jano nowonakłady abo publikacije, kenž južo dlej pśedlaže. Teke nowostki, kótarež wudawamy, luźe wěcej tak njekupuju, ako hyšći pśed pór lětami.

Co su zawiny za to?

■ To dopołnje pósuźowaś jo śěžko. Na jadnom boku jo to powšykny demografiski trend. Na drugem pak stoje nakładnistwa teke w mjazsobnej konkurency. Z rozgronow wěm, až wudawamy dobre knigły, kótarež źiśi a młodostne raźi cytaju. Teke naše temy su žywjenju a žycenjam młodeje generacije bliske.