Z Města/Cottbus. Wjelgin gnujucy koncert jo 160 gósći dožywiło sobotu, 10. oktobra, w měsćańskej Lutherowej cerkwi. Stej wustupiłej Wokalny ansambel Łužyca gromaźe ze žeńskecym a muskecym chorom Janšojce (žeńske we serbskej drastwje). Wokalny ansambel jo nawjedował David Vogel a janšojskej chora Gerald Šejn. Program jo był wjelgin derje zestajony, z dobreju měšańcu klasiskich wokalnych kusow, swětnych a nabóžnych nimskich, serbskich a engelskich spiwow. Pótakem su zaklincali tśi rěcy. Chorowej kupce stej se akle raz sam pśedstajiłej, ale někak tśeśina programa jo było zgromadne spiwanje a to we wjelgin wusokej kwaliśe. Pśechwatało jo, až Wokalny ansambel jo sobu zgłosył te znate kjarliže we serbskej rěcy ako teke naše lubowane serbske ludowe arije. Tak smy mjazy drugim słyšali „Kněz, buź pśi mnje“, „Och spiwaj mója duša“, což jo był titelny spiw cełego koncerta, abo teke „Gusyna kwětka“, „Serbam“ abo „Mój dom“. A ten wjeliki a kšasny finale jo był „Gaž bóžemje ptaški kśě dawaś“. Wuzwignuś dejtej se teke wuběrnej solowej wustupa ukrainskego akordeonista Vasyl Kravchuk.