Z Helsinki/Helsingfors. W septemberje, ga wót 17. až do 20., su se zastupnice a zastupniki mjeńšynowych rěcow a rěcnych zgromaźeństwow z cełeje Europy na 70. FUEN-kongres zmakali. Gósćinaŕska organizacija jo była šwedojska ludowa zgromaźina we Finskej „Folktinget“. Finske głowne město pokazujo se jasnje ako dwójorěcne zgromaźeństwo. Dwójorěcnosć se namakajo how samo na jězdnickach za śěg a za elektrisku. Mimo togo jo šwedšćina kšuty źěl wšednego dnja a jo powědana rěc we wšednem žywjenju a druga amtska rěc.

Kongres jo za federalistisku uniju europskich narodnosćow (FUEN) głowna zgromaźina wšyknych cłonkojskich organizacijow, kótaraž dajo rum za diskusije a jo ramik za wobzamknjenja a rezolucije. We fokusu 70. kongresa su stojali rěcne planowanje we wobceŕkoma medijow a strowotnistwa, wužywanje a šanse kumštneje inteligence a geoblocking.