Z Raduša/Raddusch. Což te wótběgi w radušańskej Witaj-źiśowni „Marjana Domaškojc“ wósebnje pregujo, to jo pódla prakticěrowaneje dwójorěcnosći teke to: Nanejmjenjej raz wob tyźeń, pśi rědnem wjedrje teke wótere raze, se wupóraju te źiśi ze swójimi wótkubłaŕkami na Carnu góru (Schwarzer Berg). Mjaztym až su wótkubłaŕki z nakśebjatnikami a wózykami ducy, mógu źiśi tu drogu na góru z lažkeju nogu na se braś. Wšykno se sobu wzejo, což te źiśi trjebaju, aby se w swójom „gólnem hotelu“ derje culi. Pśed mócnym słyńcom šćitaju te bomy w bogatej licbje. Jano šćit pśed mócnym dešćom njejo w slědnych lětach wěcej dało.

Něgajšny twaŕski wóz jo był rozpadnjony a pśez wandalizm kradu knicomny. Spěchowańske towaristwo źiśownje jo wobzamknuło pśed pěś lětami, až jo něco nowego trjebne. Jim pak njejo se widało, kótare proce a kosty by pśed nimi lažali. Ta łoni data 16-bocna twaŕska dowólnosć, mjazy nimi pěś bokow pšawniske pokazki, jo pótom skóńcnje drogu wurownała.