Z Wochoz/Nochten. Bogumił Šwjela (1873-1948) jo we Wochozach swóje slědy zawóstajił. Wšak jo ten serbski faraŕ, redaktor, rěcywědnik a iniciator a sobuzałožaŕ Domowiny tam jano krotko statkował, ga wót 1908 do 1913. Weto jo to był (tak jo wón pózdźej napisał) nejrědnjejšy cas jogo žywjenja. Lěta pózdźej – pó naci-diktaturje a Drugej swětowej wójnje – jo se wótměła we Wochozach, w Kerlic gósćeńcu (Gasthaus Kerla), w maju 1946 zgromaźina. „A tegdy jo nastała Domowinska kupka. Jeje prědny pśedsedaŕ jo był Maks Laduš (Max Ladusch). Dalšne prědne cłonki su byli Gustaw Laduš (Gustav Ladusch), Kurt Balzer, Fryco Měto (Fritz Mietho)“, jo wulicowała 86-lětna Inga Nowakowa (Inge Noack), źinsajšna pśedsedaŕka, 27. septembra wó dłujkich stawiznach teje kupki. Cłonki, něgajšne cłonki a zajmce su gromaźe swěśili 80-lětne wobstaśe wochozańskeje Domowinskeje kupki. Serbska dujaŕska kapała Horjany jo jich ku tej góźbje ze swójeju muziku rozwjaseliła.