Z Města/Cottbus. Na Pódpołdnjowem kjarchobje w Chóśebuzu su teke žedne zasłužbne a wjelgin znate serbske wósobiny zakopowane. Jich rowy tam za wětšy źěl hyšći su. Což jo młogim wěsće znate, až jo how row dolnoserbskego spisowaśela a ceptarja Fryco Rocha, kenž jo se w Šejnejźe naroźił (1863–1942). Jogo row woplěwa Domowinska kupka Chóśebuz. A serbski faraŕ Herbert Nowak a Jurij Pětška, dłujkolětny direktor Serbskeje rozšyrjoneje wušeje šule Marjana Domaškojc, stej how swój slědny wótpocynk namakałej.

Teke row wót Fryca Kitlarja (1891–1981), znatego serbskego ludowego wuměłca, jo hyšći na toś tom nejwětšem chóśebuskem kjarchobje. Wón jo se w Radowizy blisko Mósta naroźił a jo dłujki cas źěłał ako ceptaŕ w městašku Belgern. Pódla togo jo stwórił wjelgin rědne wustśiganki (Scherenschnitte) a wuměłske pisma. Jogo row tam hyšći jo a k tomu teke ten kamjeń, wjele lět dłujko jo Kathrin Urbanscyna ten južo bejnje stary row woplěwała.

Něnt pak co Město jen pó 45 lětach wótpóraś, a pśi tom ma se pó měsćańskich póstajenjach, kak dłujko směju rowy wóstaś.