Z Budyšyna/Bautzen. Wjeraški grajnego plana kaž teke změny respektiwnje nowosći nastupajucy personal su byli śěžyšća casnikaŕskeje konference 8. septembra, pśi kótarejž jo Nimsko-serbske ludowe źiwadło (NSLŹ) medijowym zastupnikam grajnu sezonu 2026/2027 pśedstajiło. Nowy głowny grajny wjednik (Oberspielleiter) Alexander Maruš (Marusch), nowa wjeźeca dramaturgowka Judith Zieprig, zastupnika intendanta za serbske źiwadło Julija Klingnerec a Marian Bulank kaž teke wjednik šparty pupkowe graśe Tim Heilmann su pśipowěźeli dogromady 21 premjerow. Prědna z nich jo se južo 19. septembra w Haslowje (Dreikretscham) wótměła, źož jo se prědny raz pokazała górnoserbska wersija komediantiskeje muzikoweje revue „Juhu! Floppy Dolls su zaso tu“ Měrka Brankačka. (Ju jo dožywiło 80 zagórjonych woglědari).