Wittstock/Dosse. Wót lěta 2001 se swěśi w Europje „źeń rěcow“. Cil jo teke, na wěcejrěcnosć pokazaś a dla togo jo 26. september Europski źeń rěcow. Južo kóńc tyźenja do togo jo Bramborski kšywowy zwězk dolnonimski (plattdeutsch) powědajucych pśepšosył do Wittstocka w Prignicy na „źeń dolnonimskeje rěcy“. Neele Hübner, Bramborska wjelikopósłańcka za dolnonimšćinu, jo na to pokazała, až njemusyš rěc dospołnje wobkněžyś, aby ju powědał: Južo słowko abo wobrot dosega, aby rěc zasej we wšednem dnju prezentna była. Dla togo dej se rěc mócnjej widobna a słyšabna cyniś. Michael Brentrup, wótrědnik we Ministaŕstwje za wědomnosć, slěźenje a kulturu, kenž jo rowno tak za dolnonimšćinu ako za serbske nastupnosći zagronity, jo w póstrownem słowje nalicył wšake spěchowańske aktiwity. We fokusu stoj źěło ze źiśimi a młodostnymi a na digitalnem pólu. Tak dej se rěc teke do znatych apps za wuknjenje rěcow integrěrowaś. Wósebnje jo chwalił komunalny angažement. Hynac ako we Łužycy, muse komuny w pódpołnocnej Bramborskej aktiwity za dolnonimsku rěc sami zapłaśiś.