Ze Zgórjelca/Görlitz. Pśed 35 lětami jo se prědny źeń Weimarskego tśirožka wótměł, a to ku narodninam Johanna Wolfganga von Goethe. To jo tśilateralny kooperaciski a konsultaciski forum za te tśi kraje Nimska, Francojska a Pólska. Toś ten zwězk jo se 1991 załožył ze zaměrom, pó padnjenju Barlinskeje murje Pólsku pódwjacoru zbližyś, aby historiske groble a pśedsudki wótpórali a móst twarili za gromaduźěło w srjejźnej Europje. Źinsa statkujo toś ten projekt wěcej ako wuměna a za pódpěru młoźinskego źěła. Tak jo teke było w zachadnem tyźenju na wusokošuli Žytawa/Zgórjelc (Hochschule Zittau/Görlitz). Wšakorake póbitowanja su se tam na campusu wótměli, mjazy drugim teke „speak-dating“ za wuknice a wuknikow. W małych kupkach su za 15 minutow z jadneju za nich njeznateju abo jano mało znateju rěcu se zaběrali. A to su byli francojšćina, pólšćina, češćina, ukrainšćina a dolnoserbšćina.