Z Pódstupima/Potsdam. „Nacasne serbske wuměłstwo – Načasne serbske wuměłstwo – Zeitgenössische sorbische Kunst“ se groni wustajeńcy, kótaraž wót 27. septembra wubrane, zwětšego nowše a nejnowše twóŕby wót nagromadu źaseś wuměłcowkow a wuměłcow w pódstupimskem Wuměłstwowem domje pokazujo. Pśeglědka prezentěrujo mjazy drugim mólby, wustśiganki, fotografije, tekstilne wuměłstwo a instalacije cłonkow gibanja NSK Lipsk (skrotconka stoj za Neue sorbische Kunst) respektiwnje Kolektiwa Wakuum. Wernisažu wótwórjujucy jo wuzwignuł pśedsedaŕ towaristwa „Kunsthaus Potsdam“ Martin Gorholt, až wustajeńca wótbłyšćujo, kak se serbske wuměłstwo njeglědajucy na „wjeliki pśiměrjeński śišć wuwija“. Wón jo naspomnjeł aktualne pśistupy a wuglědy na to, kótaru rolu Serby pśichodnje w Sakskej a Bramborskej graju. „Rowno dla togo prezentěrujomy ju w bramborskej stolicy.“ W toś tom zwisku jo źěkował mjazy drugim zjawnej za wše wužytnej Bramborskej towarišnosći za kulturu a historiju kaž teke Załožbje za serbski lud za pódpěru.