Pśi konferency „Urbane a regionalne planowanje, mjeńšynowa governance a serbska kultura“ w Chóśebuzu (centralny campus BTU) su referěrowali (wótlěwa): Bernhard Weyrauch (BTU), Richard Pantzier (BTU), Ludger Gailing (BTU), Daniel Häfner, Lutz Laschewski (SI), Jenny Hagemann (SI), Měto Nowak (SI) a Hanka Rjenšojc (SI). 
Z Města/Cottbus. „My se how pógibujomy na nowych drogach“, jo wuzwignuł Lutz Laschewski, wjednik wótźělenja Regionalne wuwiśe a šćit mjeńšynow (Regmje) pśi Serbskem instituśe (SI), pśi wótwórjenju konference „Urbane a regionalne planowanje, mjeńšynowa governance a serbska kultura“ stwórtk, 17. septembra.
Na tu konferencu w rumnosćach we wucbnem twarjenju 2C/D na centralnem campusu Bramborskeje techniskeje uniwersity (BTU) Chóśebuz-Zły Komorow jo pśepšosyło wótźělenje Regmje gromaźe z Fakultu architektura, twaŕske inženjerstwo a urbane planowanje wót BTU. Mjazy tymi 40 wobźělnikami su byli pśedewšym wědomnostnice a wědomnostniki kaž teke akterki a aktery serbskich mjeńšynowych organizacijow, na drugem boce mjenjej zastupnice a zastupniki z rumowego planowanja a regionalneje politiki, na kótarychž jo se pśepšosenje tejerownosći wobrośiło.
