Sobu – to jo za nas wažne słowo. To njegroni jano: „mit“. Za nas štycy hyšći wjele wěcej za tym. To jo słowo, kenž namakajoš ned tśi raze w mjenju našeje webstrony.

Co to dokradnje groni?

Pójź sobu – na dyrdakojstwo wuknjenja rěcow.

Cyń sobu – a wugótuj wopśimjeśa aktiwnje sobu.

Wzej sobu – a wužywaj wjelerakosć praksy bliskich materialijow.

Rowno to jo ideja našogo nowego póbitowanja.

Wó co źo?

Wót oktobra stajijomy platformu z materialijami za wuknjenje serbskeje rěcy k dispoziciji. Pórucenja su tak spśigótowane, až mógu se w pedagogiskem wšednem dnju ned wužywaś. To jo móžno w źiśowni a teke w situacijach doma.

Za kogo jo bok myslony?

Za wótkubłaŕki a wótkubłarje w źiśownjach a hortach a teke za starjejšych. Za wšyknych, kenž kśě w jadnotliwych situacijach serbsku rěc wužywaś a trjebaju za to prědne naraźenja z jadnorymi sadami. Na webstronje namakajośo rěcne pśikłady, downloady, gótowe materialije a wjele drugich impulsow, na pśikład spiwy, wulicowanja a gronka. Jo to wuknjeński material za źiśi w starstwje wót dweju do źaseś lět.

Jo južo wšykno gótowe?