Z Gólbina/Gulben. Dnja 12. a 13. septembra jo zasej był cas za serbsku kjarmušu w Gołbinje. Pśed tym jo se pilnje za to wabiło. Naša młoźina jo tśi krotke, rozwjaselece wideo nawjerśeła, kótarež su teke pla mjenjej wuznatych wužywarjow medijow dobry wótgłos namakali. Zagórjenje jo teke žněł wót jadneje wjelgin wjelebocnje a z wjele wutšobineju kšwju angažěrowaneje Gołbinaŕki kreěrowany wideo wó pśigótowanjach, kótaryž jo se ekskluziwnje prezentěrował pětk ku generalnej probje.

Pśi tom jo se južo wułušćiło, až su se zasej wšykne starstwowe kupki ze swójimi talentami zapśimjeli.

Sobotu wjacor njejsu jano te serbske drastwy w kšasnje dekorěrowanem swěźeńskem stanje za dobru lawnu se starali. Lětosa su se prědny raz te „Gołbinske kurjetka“ pśi kjarmušowej reji do krejza młoźiny pśiwzeli. Pó jadnom spiwje, krotkem nagronje a pśepódaśu rědneju pśepasowu stej zmejstrowałej wobej gólca-nowacka swóje prědne reje ako cłonka młoźiny.