Z Lubnjowa/Lübbenau. W toś tom błośańskem měsće ze swójimi 16.000 wobydlarjami se južo dlejšy cas wjele twari. Dotwarjony jo šyroki a dłujki tunel, pśez kótaryž mógu se něnto wobydlarje dostaś z awtom, z kólasom a pěšy z nowego źěla města do starego źěla Lubnjowa. Dalej se pśi głownej droze wót Wětošowa do Lubnjowa teke pilnje twari. A tam, źož jo raz stojała lubnjojska milinaŕnja, su chopili twariś wjeliki centrum za licenje, kótaryž dej byś ten nejmodernjejšy w Europje.

To pak njejo hyšći wšo, což buźo nowego w Lubnjowje. Dokulaž jo to błośańske město teke znate pśez swóje górki, deje wóni dostaś w měsće swójo wósebne městno, ga „górkowy swět“. Załožyś kśě to blisko dwórnišća, tam, źož něnto hyšći stoj stara „kólnja“ za lokomotiwy. Jadnab 12.000 kwadratnych mejtarjow wjeliki dej byś to nowe twarjenje. How njamógu luźe jano kupiś wšake sorty górkow, ale mógu teke wiźeś, kak se wóni sajźaju, žněju a pśeźěłaju a wjele drugego, což ma cyniś z górkami. Wósebna atrakcija dej byś how górkowa rostlina, ako jo 30 mejtari wusoka.