Ze Slěpego/Schleife. W Slěpem jo se srjodu tyźeń wótměł finale šyjarnego wuběźowanja „Duch casa z nitku“. Jadnasćo wobźělnikow jo źěłało na źaseś projektach ze zaměrom, tradicionelne serbske sukno z moderneju drastwu kombiněrowaś. Organizěrował jo wuběźowanje projekt SorbIT.

Skóńcna prezentacija jo se wótměła w Slěpjańskej piwaŕni. Na improwizěrowanem jawišću su wobźělniki jaden za drugim prezentěrowali swóje projekty. Kuždy jo pśinjasł drastwy, kótarež su byli ze serbskim suknom wupyšnjone abo dopołnje z njogo napórane. Někotare wobźělniki su ze serbskimi suknami wupyšnili drastwy, kótarež su južo měli we swójej garderobje – t-shirty, suknje a kóšule, muskece woblaki a źiśecu drastwu. Tak su wóni dali starym drastwam nowe žywjenje. Druge su zgótowali dopołnje nowu drastwu abo wěcy na pśikład: taški, etwij za brylu, zagłowki, šorce za grilowanje a wjele drugego.