Sobotu su na Górach kokota zabijali. Wobźěliło jo se šesć mužow a sedym žeńskich w serbskej drastwje. Nejšykownjejšy z cepami jo był Finn Lemanski a jo sebje zawěsćił titel górjańskego žnjownego krala. Jogo kralowka jo wordowała Lena Pankojc. Drugi kral Tristan Troppa jo dostał dobyśaŕku togo z jajom gnaśa ako kralowku, a to jo była Anna Nippojc. Ako tśeśi kralojski pórik stej se k nim pśitowarišyłej Lukas Lanz (wón jo kokota pópadnuł; jogo su nowo do młoźiny pśiwzeli) a Lisa-Marie Šteklinojc (Stecklina). Pśipódla su teke źiśi wšake serbske žnjowne nałogi wuproběrowali.

Priwatnje organizěrowane jo było łapanje kokota njeźelu pla Muškojc w Smogorjowje. Wobźěliło jo se něźi 22 rejtarjow a 12 źowćow w drastwje. Głowu kokota wótryś, to jo se raźiło Philippoju Kisseloju z Popojc. Wón jo wšak mimo kralowki wóstał. Wuzwólenje kralowkow njejsu pśewjadli, dokulaž źowća su byli tak pilnje do pśedawanja tykańcow zapśěgnjone.