Z Města/Cottbus. Towaristwo Eck 51 jo kazało na scełego prědnu wustajeńcu (glej teke https://eck51.de/) a 25 luźi wšakich generacijow jo stwórtk, 3. septembra, na wernisažu-wótwórjenje do rumnosći ze samskim mjenim na Dwórnišćowej w Měsće pśišło. Pśedawańska wustajeńca, tak 81-lětna wuměłcowka Ingrid Groschke/Grošcyna (*1945), pak buźo za nju ta slědna. Wustajeńca wopśimjejo 17 wobrazow, zwětšego wólejowe mólby. Wšykne maju ceło konkretne, pśisamem dokumentariske titele ako „Die Florentine (stary dub) bei Straupitz“, „Fischer Buchan aus Leipe“, „Meine Mutter“, „Hochzeitsbitter“ (ze slěpjańskego regiona), „Gehöft in Burg mit Storch“, ale njamaju pśipisane lěto nastaśa. Stil mólaŕki jo realistisko-impresionistiski, temy su zapołožone w regionalnem. Toś słuša to serbske ceło pśirodnje k tomu.