Z Města/Cottbus. Chto co wiźeś, kak jo wuglědało pśed wušej 100 lětami originalne serbske žywjenje w Błotach, ten dej hyś do Serbskego muzeja w Měsće. Pód motom, „Woblica ze zajźonego casa / Gesichter einer Zeit“ buźo tam až do februara pśiducego lěta nowa wósebna wustajeńca. Wósebna wóna napšawdu jo a k tomu hyšći wjelgin gódna, interesenta a rědna. We dwěma rumnosćoma ga su tam wugótowali a zestajili wustajeńcu ze 70 carno-běłymi fotami. A lěcrownož su wóni južo bejnje stare, rědnjej njeby mógał fotograf take motiwy ze źinsajšneju moderneju kameru wótmólowaś.

Chto ga jo był ten luź, wót kogo něnt mamy toś te fota? Jomu se groni William Albert Denis Galloway (1878 – 1957), a wón jo se naroźił w Šotiskej. Pó dlejšem casu pla wójakow jo woglědał šuli za wuměłstwo w Londonje. Ako wukubłany fotograf, wuměłc a etnograf jo póbył w lětach 1908 do 1914 w Dolnej Łužycy a w stronach kołowokoło Kulowa (Wittichenau). Za tym jo žywy był w Hollandskej a pótom w lětach 1926 do 1950 w Rumuńskej w měsće Cluj (w Sedymgrodskej/Siebenbürgen). Wumrěł jo w Londonje w lěśe 1957.