Z Města/Cottbus. Hyšći až do 20. septembra se wótměju wustajeńce a druge zarědowanja w ramiku prědneje Openart Lausitz Biennale we wokrejsach Dubja-Błota, Górne Błota-Łužyca, Łobjo-Halšter, Sprjewja-Nysa a we Chóśebuzu. Toś ta Biennale se rozmějo ako „strategiski kulturny projekt“, pśeto strukturna změna jo teke kulturelny proces. „Wuměłske pozicije pšašaju za identitu, za pśisłušnosću, za nazgónjenjami, za spomnjeśim a zagronitosću w konkretnej pśibytnosći. [...] We tom zmysle jo Biennale wěcej ako kulturelne tšojenje. Wóna jo póbitowanje k sobumyslenju a sobuwugótowanju w regionje, kótaryž jo pśikład za wjele transformaciskich rumow w Europje“ – tak to zni z póstrownych słowow dr. Manje Schüle, ministaŕki za wědomnosć, slěźenje a kulturu kraja Bramborska.