Z Mósta/Heinersbrück. „Wšykno jo klapowało, njejo dało problemy“, reziměrujo młoźinski šef Lorenz Pawlik (Paulick) nastupajucy łapanja kokota w Mósće. Dnja 29. awgusta jo se wobźěliło šesć rejtarjow a 12 źowćow w serbskej drastwje na lětosnem žnjownem swěźenju.

Južo pśi pśigótowanjach jo wšykno mimo problemow wótběgnuło, te gólcy su šli pó to zelene a źowća su wili girlandu za fortu a tych šesć wěncow. Sobotu zajtša su rejtarje a pomocniki ze jsy tu fortu na naměsće pódla wognjoweje wobory stajili. Z krotkim pśeśěgom pó jsy, z kótarymž su se wšykne wobźělniki k wuběgowanišćoju pórali, jo se zachopiło łapanje kokota.

Lětosa jo to drje był kradu młody kokot a rejtarje su duchowite (beherzt) za nim „grapsnuli“. W mjenjej ako dwěma góźinoma su wšykne tśo žnjowne krale swój wěnc dostali. Dobry kóń a nazgónjenje – take něco se wupłaśijo. Tak jo mógał Lorenz Pauwik sebje zasej prědne městno zawěsćiś. 2018 běšo wón dobył Superkokot w Běłej Górje a jo jogo do Mósta pśinjasł. Prědne kśidło kokota jo wótrył Jeremy Krüger, druge kśidło a z tym tśeśe městno stej słušałej Tom Volkmannoju.