Z Janšojc/Jänschwalde. Kak móžo se ten dwójny jubilej źiśownje nejlěpjej cesćiś? Se wě z wjelikim swěźenjom z wuběrnym programom, wjelimi chłošćonkami, pśijaznymi gósćimi a nejlěpšeju atmosferu. Tak jo źiśownja „Lutki“ dnja 4. septembra pšosyła na jeje pśerědne grunty na kšomje góle w Janšojcach-Pódzjatšu: „Pójźćo mimo a swěśćo z nami! My se wjaselimy na Was!“

Wjednica źiśownje Kerstin Schneiderowa a zastupna wjednica Katja Büttnerowa stej pówitałej gósći w bogatej licbje w serbskej a nimskej rěcy. Cesne gósći su byli Michael Koch, decernent za socialne, strowotu, młoźinu, kubłanje a kulturu pśi wokrejsu Sprjewja-Nysa, Romy Ruffowa, zagronita za serbske nastupnosći we wokrejsu Sprjewja-Nysa, Norbert Krüger, amtski direktor amta Picnjo a Helmut Badtke, šołta gmejny Janšojce. Teke wšyknym sponsoram a pśewóźowarjam pó droze jo wósebny źěk płaśił.