Ze Złego Komorowa/Senftenberg. Južo wjele napšašowanjow šulow jo dojšło na źiwadłowu pedagogiku Nowego jawišća Zły Komorow. Wjelgin se za to zajmuju, se ze šulskimi rědownjami woglědaś inscenaciju „Krabat“, kótaraž změjo teke wótere dopołdnjejše, za šule se góźece terminy. „Jo to graśe pśedewšym za publikum wót 10 lět. Budu zajtšne, ale teke wjacorne pśedstajenja, wšak se góźi ta maśizna za wšykne starstwowe kupki“, tak groni „nan“ togo kusa, ga režiser, muzikaŕ a awtor Markolf Naujoks, kenž se teke južo wjaseli na premjeru sobotu, 19. septembra, zeger 19:30. Ten 45-lětny, kenž jo se w Kölnje naroźił a tam mjaztym zasej bydli, statkujo wót 15 lět ako źiwadłowy režiser. Pokazali su se jogo kuse južo na wjele jawišćach pó cełej Nimskej (mjazy drugim w Heidelbergu, Braunschweigu, Ulmje, Hamburgu) a w šwicaŕskem Luzernje. Ako wjeliki fan Ottfrieda Preußlera jo se wón teke jogo romanoju „Krabat“ pśiwobrośił. „Te knigły su wjelgin, wjelgin wuběrne! Ale teke ta maśizna ako taka jo wósebna. Tam se jawje politiske aspekty, kótarež su pśecej hyšći kradu aktualne“, tak Naujoks.