Z Pódstupima/Potsdam. Krajny zagronity za nastupnosći Serbow, statny sekretaŕ w Ministaŕstwje za wědomnosć a kulturu Tobias Dünow wupišo lětosa to mjaztym pěte Myto Miny Witkojc za angažement na pólu serbskeje rěcy. „Z mytom Miny Witkojc comy pódšmarnuś: Serbska rěc a kultura stej centralny źěł łužyskeje identity a domownje – mimo njeju njamóžoš sebje Bramborsku pśedstajiś. Angažement na pólu serbskeje rěcy pśinosujo k zdźaržanju wobgrozoneje kultury a mjeńšyny, k wjelerakosći we našom kraju a k pśichodoju Łužyce. Pśez to myto pśipóznajomy wósebnu angažěrowanosć za dolnoserbsku rěc: za jeje zdźaržanje, dalejdawanje, rewitalizaciju a dalejwuwiśe.

W zachadnych lětach smy měli někotare wobźiwowanja gódne laureatki a laureaty: Witaj-źiśownju Mato Rizo, slawista Manfreda Starostu, wuměłca Bernda Pittkuningsa a wědomnostnicu Madlenu Norberg. Ja se zasej wjaselim na wjelicke naraźenja kandidatow!“