Z Města/Cottbus. Abituru w kapsy, wuchójźili šulu, 18. narodny źeń su swěśili a co něnto? Wótejś? Wóstaś? To su pšašanja a myslenja za wjele młodych, kenž su šulu skóńcyli a se něnto na nowy žywjeński puś wudaju. Pśi tom graju teke wjeliku rolu to rozsuźenje, doma we Łužycy wóstaś abo skerjej se wudaś do bliskich abo dalokich stronow. A rowno z tym jo se młoźinski klub Piccolo źiwadła zaběrał, dokulaž to jo wěcej ako aktualne. Wjele cłonkow togo kluba stoj rowno pśed wónym rozsuźenim abo jo se južo rozsuźiło. To teke groni, až 80 minutow dłujki kus jo był ten slědny we tej konstelaciji grajucych.

W ramiku Łužyskego festiwala su wšykne źiwadłowniki a źiwadłownice w zachadnych mjasecach wše sceny sami pisali, to groni, až su se wšykno sami wumyslili. Pódpěru pśi tom su dostali wót Matthiasa Heine, kenž jo wuměłski wjednik źiwadła Piccolo, a wót chóśebuskeje bestseller-awtorki Ruth Maria Thomasoweje, kótaraž jo pśi pisanju togo kusa pomagała.