Ze Serbskego Domu/Wendisches Haus. Na pósejźenju pśedsedaŕstwa Domowinskeje župy Dolna Łužyca slědny tyźeń wałtoru w Serbskem domje su słyšali cłonki a gósći wjelgin dobru powěsć. Župan Michael Apel jo k wěsći dał, až co dalej źěłaś w tej wažnej Domowinskej funkciji. To groni až do pśiduceje wólbneje zgromaźiny dolnołužyskeje Domowiny w lěśe 2029. Cłonki župnego pśedsedaŕstwa su to wjelgin witali, až jo se Michael Apel tak rozsuźił.

Wón jo se dał na głownej zgromaźinje łoni we februarje w Žylowje wuzwóliś do nowego župnego pśedsedaŕstwa. Krotko za tym jo nowe župne pśedsedaŕstwo na swójom prědnem pósejźenju na zachopjeńku měrca wuzwóliło Michaela Apela za amt nowego župana. A to jano za cas až do pśiduceje głowneje zgromaźiny, ako buźo něnto 11. septembra w Hochozy. Tam mógu delegaty jogo hyšći raz wuzwóliś ako župana za pśiduce tśi lěta.