Z Města/Cottbus. Serbski dom w Chóśebuzu ma teke rědny wjeliki dwór. Wón jo se w slědnych lětach wužywał za wšake serbske swěźenje a zarědowanja. Pśi tom jo se pokazało, až se wón za to derje góźi. To mógu teke cłonki Domowinskeje kupki Chóśebuz groniś, ako su se zachadny pětk wótpołdnja na dwórje zmakali. Pśedsedaŕstwo kupki ga jo jich wutšobnje pśepšosyło na zgromadny dwórowy swěźeń.

Njejo to był prědny raz, až su se chóśebuske Domowinske cłonki na taki part zmakali. Kupka ze swójimi jadnab 70 cłonkami se ga procujo, za swójich cłonkow a gromaźe z nimi organizěrowaś móžnosći za take zmakanja. Pśi tom ma we wócku, až jo mjazy cłonkami wjele žeńskich a muskich, ako su južo w rentnaŕskej starobje a njamógu pśiś na wjacorne zarědowanja. To se pokažo teke we wobźělenju na głownej zgromaźinje, na gódownicce a na serbskej kjarmušy. Togodla jo se pśedsedaŕstwo rozsuźiło wugótowaś zgromadny swěźeń na dwórje, a to južo wótpołdnja. Taki jo se južo raz pśewjadł.