Ze Złego Komorowa/Senftenberg. Njeźelu, 16. awgusta, jo se wótměła tradicionelna serbsko–nimska namša we złykomorojskem wobydlaŕskem domje, to jo něgajšna Serbska cerkwja. Wót lěta 2011 jo se wósadny faraŕ Manfred Schwarz za to zasajźił, až tam jo raz wob lěto namša w serbskej rěcy. Z tym jo to była lětosa 16. dwójorěcna tamna Bóža słužba nowšego casa. Mjaztym faraŕ Schwarz jo šeł na wuměńk a jo něnto žywy w swójej rodnej jsy, w Bórkowach. Z jogo naslědnikom Sebastian Schlauraff-Schällerom jo se wšake změniło. Wón njama serbsku slězynu, ale jo weto serbskej rěcy wjelgin pśichylony. Tak jo wótběgnuła namša na zwuconu dwójorěcnu wašnju, jano až prjatkowanje jo tenraz było nimskorěcne. Serbski part, ako módlitwa psalma 145 a cytanje ewangeliuma wót farizejarja a cłonarja, kenž stoj pla Lukasa we 18. stawje, jo pśewzeł lektor dr. Hartmut Leipner. Jomu jo stojała pśi boce Hanka Rjelcyna, zagronita za nastupnosći Serbow wokrejsa Górne Błota–Łužyca, kótaraž jo cytała z lista pósoła Pawoła na Hefezarjow.