Z Chóśebuza/Cottbus. Witaj-camp słuša k projektam Rěcnego centruma WITAJ (RCW), kótarež su južo na tradicije bogate. Źiśi a młodostne mógu w běgu šesć dnjow dožywiś wšakorake aktiwity a wulěty we Łužycy. Głowna za projektom štyceca ideja jo, až deje se wubuźiś zajm za serbsku rěc a se spěchowaś južo eksistěrujuce rěcne znaśa.

W drugem tyźenju lěśojskich proznin, wót 19. do 24. julija, jo 20 źiśi pśijěło do Jarješka/Jerischke. Wesrjejź geoparka Mužakojskego wokłona (Muskauer Faltenbogen) lažeca wjaska ma šulski nakrajny dom (Schullandheim) a jo južo wjele lět městno Witaj-campa. Lětosa, ako jo se projekt k 20. razoju wótměł, jo se wšake změniło. Dietmar Thron njejo wěcej pśiwitał źiśi ako w zachadnyma lětźasetkoma, ale Nele Böhlig, wót 2026 nowa wjednica šulskego nakrajnego domu. Teke na boku RCW jo rolu głownego organizatora campa wótedał Aleksander Draguła na Maksa Bagańca. Pódpěrowałej ako wobstaraŕce stej jeju zasej Isabelle Grätzojc a prědny raz Rahel Zelnak, studentka sorabistiki z Kamjeńca.