Z Města/Cottbus. Hyšći jaden cele wósebny a kreatiwny highlight měś w slědnem tyźenju lěśojskich prozninow, nježli až jo pónjeźele zasej šula „wołała“ – toś tej móžnosći jo se srjodu tyźeń 14 młodostnych wjaseliło. Wóni su se wobźělili w Chóśebuzu na wenkownem terenje Wuměłstoweje hale Łužyca na graffiti-workshopje, na kótaryž jo jich pśepšosył projekt UNESCO 5 – Derbstwo Łužyce. How njejo jano šło wó nawuknjenje a nałožowanje trjebnych „skills“ za graffiti-wuměłstwo, ale teke wó zaběru z tym pśez UNESCO šćitanym derbstwom Łužyce, ku kótaremuž teke nałogi Serbow ako imaterielne kulturne derbstwo słušaju.
Dogromady na pěś takich workshopach wót 11. do 20. awgusta jo UNESCO 5 pśepšosył, kuždy jo se wótměł na jadnom UNESCO-městnje, a dogromady jo se na nich 53 młodostnych w starstwje wót 12 do 17 lět wobźěliło. Za imaterielne derbstwo serbskich nałogow jo se Chóśebuz ako městno wuzwólił.
