Impresije zašulowanjowu: Wjednica Krabatoweje šule w Janšojcach Manuela Pyrczekowa wita nowackow (górjejce). We žylojskej šuli stej se Stanisław Měškank (nalěwo) a Kari Krügerojc (napšawo) ze Zaspow ceło serbski woblaconej na swójom zašulowanju wobźěliłej. Fota: R. Kargowa/J. Michniuk/G. Zielonkowski/V. Krügerowa 
Z Dolneje Łužyce/Niederlausitz. Nowe šulske lěto jo se w Bramborskej zachopiło, w cełem kraju jo wušej 23.000 źiśi pśišło do prědneje rědownje. Teke za wjele tych, ako su južo dalej na swójom kubłańskem puśu, se zachopijo na wšaki part nowy a zapśimujucy žywjeński wótrězk. Na pśikład, gaž su změnili na dalejwjeźecu šulu. Tak su se pónjeźele na cełkownej šuli Sprjewja-Nysa w Hajnku te wuknice a wukniki prědnego tamnego lětnika sekundarnego schójźenka II cele swětosnje pśiwitali.
Nowy Casnik žycy wšym wuknicam a wuknikam w serbskem sedleńskem rumje wuspěšne nowe šulske lěto! Za tych nowackow w prědnej rědowni, to se wě, jo to wósebnje wjeliki kšac. Kak jo było zašulowanje w Janšojcach a Žylowje, to zgónijośo na pśiducem boce.
„Dobre zajtšo!“ –
zašulowanje w Janšojcach
