Z Rogozna/Willmersdorf. Wósymka jo była na tom kóńcu tyźenja ten magiski numer. Teke w Rogoznje jo młoźina mjazy wósym rejtarjami wuzgóniła swójogo žnjownego krala. Wót športnišća jo młoźina śěgnuła k sańkowanišćoju, źož su južo rědnje wugótowanu fortu stajili. Ju su źowća a gólcy južo pśed kokotom z girlandu z dubowego lista wupyšnili. Wóni pak njejsu jano fortu a wěnce za dobyśarjow, ale teke žnjownu kronu wuwili. „Kužde tśeśe abo stwórte lěto wijomy žnjownu kronu z trajdy nowo. To jo wótwisne wót togo, kak trajda pó lětach wuglěda“, jo rozkładł młoźinski šef Tim Rethfeldt. Ta žnjowna krona wobstoj ze tśich sortow trajdy: z wowsa, pšenice a jacmjenja.