Z Grodka/Spremberg. Juskotanje a luštny ruš, to słuša k rědnym bokam swěźenja. Ale Grodk jo góspodaŕski rozmógujuce (aufstrebend) město a co to tek wóstaś. K tomu pśinosuju Industrijowy park Carna Plumpa, procowanja wót „Kupferschiefer Lausitz GmbH“ wó wótwórjenje tudskeje kuporoweje warstwy, a teke LEAG, kótaraž se stara we Łužycy wó energije, kótarež daju se pśenowiś. Wjele drugich pśiźo k tomu, wósebnje mała a srjejźna industrija kaž teke rucnikaŕstwo. A wšykne pytaju za sobuźěłaśerjami. Wótkul deje wóni pśiś?