Z Małego Kólska/Klein Kölzig. Jo cas prozninow a na wjele městnach se we tych tyźenjach póbituju wósebnje za źiśi a młodostnych móžnosći zmysłapołnego wugótowanja wólnego casa. Tak teke w Nimsko-pólskem UNESCO Global Geoparku Mužakojski wokłon, zastupjony pśez EVTZ mbH (Europski zwězk za teritorialne gromadne źěło) w Starej cyglowni Mały Kólsk. How jo to mjaztym tradicija, kužde druge lěto młodostnych na Mjazynarodny camp Geoparka (Internationales Geoparkcamp) pśepšosyś. Pśed pór tyźenjow, w juliju, jo se wón zasej wótměł. Lětosa su pśišli te wobźělniki – jich jo było 35 w starstwje wót 15 do 18 lět – z Finskeje, Rumuńskeje, Grichiskeje, Pólskeje a Nimskeje (gósćinaŕski kraj). Wšykne su bydlili w lěgwje za wólny cas (Freizeitcamp) w Bóšojcach (Bohsdorf) nad Feliksowym jazorom, ga pód samym rozglědnym tormom wesrjejź geoparka. Wobstaranje (Betreuung) młodostnych jo pśewzeła EVTZ GmbH. Zakładna mysl se złožujo na do-seśi-zwězanje europejskich geoparkow. Geoparki dajo we wšych krajach a młodostne pśidu tam z pódobnymi zajmami gromadu.